ئەدەب و هونەر

ڕاز و ڕمووزێن قودرەتی .

ــ وەحید سندی : ماموستایێ زانکوێ .

ئەڤ جیهان هەمی سەراپا یا تژی ژ ڕەمز و نهێنیایە، ئەڤ نهێنیە ژی یێن ڤەشارتینە و زوی ب زوی بۆ هەر کەسێ دیار نابن، بەلکو کۆمەکا ڕێکا ل پێشە و دڤێت ب چوون د وی سنۆریدا ببت ئەگەر بۆ گەهشتن ب ڕاز و نهێنیێن ڤێ جیهانێ.
ڕەوتێ فەلسەفا ئەرستۆی، د وێ باوەرێدابوون مرۆڤ دشێت ب عەقلێ خوە (عەقلێ بەشی) یان ژی ب ئیستیدلالاتێن خوە یێن عەقلی بگەهت حەقیقەتا ڤان نهێنیان و وان ببینت، لێ د هەمان دەمدا ڕەوتێ فەلسەفا ئەفلاتوونی ـ ئەڤی ڕەوتی هێزا زێدەتر د ئیسلامێدا پەیداکر ژ ڕەوتێ ئەرستۆی ـ ئەڤا پشتبەستن ل سەر دوو چەمکێن (عەقلێ بەشی = جزئی، شهود)ێ کریە، ئەوان عەقل ددا کاری هەتا ڕادێ دشیا کارێ خوە بکەت، هەردەما سنۆرێن عەقلی ڕاوەستابان، ژ وێرێ پێڤە دەست ددا ئالیێ شهودێ و دیتنێن دلی.
شهود یان ژی دیتنا دلی، ئەگەر باشتر ب چەمکەکێ عرفانی بێژم: (چاڤێ دلی)، ئەو دیتنا ڕووحێ یە ژ کۆمەکا نهێنیان، ئەو ڕەمز و ڕازێن ڤەشارتی، دەما ب عەقلی ڕون نەبن ـ د دیتنا ئەفلاتوونیدا ـ ب ڕێکا چاڤێ دلی ڕون دبن، ئانکو عەقلێ ڕەها (مطلق)تاکە ژێدەرێ وەرگرتنا ڕاز و نهێنیان نینە، بەلکو بارا مەزن بەر ب دیتنا دلی دکەڤت.
د ناڤ عارفێن ئیسلامیدا، مەلایێ جزیری ئەڤ ڕەوتە هەلبژاردیە و وی ژی باوەریەکا تەمام ب نەرینا ئەفلاتوونی هەیە، ئەڤا شێخ شهاب الدین سهروردی پشتگریا وێ دکەت، جزیری ب باوەرە
“تەفسیرێ سڕرا ئایەتێ
عارف دڤێتن گوه دەتێ
ڕازا ڕمووزێن قودرەتێ
گەر دەین بکین مەعذوورە دل”
‌ دیوان جزیری، دۆسکی،ل209

ئەگەر عارف ئەوان نهێنیان دەربێخت ژی وی دەمی ئەو یێ مەعزورە و چ کێشە نینە.
دیارە کۆمەکا سڕ و نهێنیان د ناڤ دلێ ویدا ئاشکرابوونە و ئەوێ زانایە ب تەفسیرا ئایەتان.
یان ژی د هەمان هەلبەستا بوریدا، جزیری دلێ خوە ب ڕەنگڤەدانا نوورا خودێ وەسفکریە، دەما کەرەم دکەت:
“دل لێ بدت نوورا مەیێ
وەقتێ سەواش و هەی هەیێ
فەهم ئەر بکی وەحیا نەیێ
ژێ دت خەبەر مەئموورە دل”
دیوانا جزیری، ل209

زێدەتر ببینە

بابەتێن پەیوەندیدار

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close
Close