گوتار

پەیوەندی و ڤیانا کور و کچان د تۆرێن جڤاکی دا

خالد زورو ــ دهوک

ل دەستپێکێ من دڤێت ئەز باس ل گریمانا زانایێ ب ناڤ و دەنگ یێ ئەلمانی (ئێریک فرۆم)، سەبارەت ب ڤیانێ بکەم، و بوچوونا خوە لسەر گریمانا وی بێژم، کو خوەستیە وێ یەکێ رۆنبکەت، “ئایا ڤیان بتنێ هۆنەرە؟ ئانکو پێدڤی ب زانین و هەول و شیانایە.
یان ڤیان هەستەکێ ب تامە و بدەستڤەهینانا وی هەستی تشتەکە بتنێ مرۆڤێ بەختەوەر د بینت و تێدکەڤت؟”
لێنرینا ئەڤی زانایی بۆ ڤیانێ لسەر گریمانا ئێکێ رادوەستیت، و دوێ باوەریێ دایە کو ڤیان هۆنەرە و پێدڤی ب زانین و شیانەیە، و ڤیان خوە گۆریکرن و پێشکێشکرنە، نەک ستاندن و وەرگرتنە، دڤێت مرۆڤ ب چاڤەکی پیرۆز تەماشەی ڤیانێ بکەت، و وەک هەموو هۆنەرێن دی مرۆڤ پێدڤی ب فێربوونا وییە، بەری کو ڤیانێ بکەت. هەر وەک چاوا ئەگەر مە بڤێت فیری هۆنەرێ نۆژداریێ ببن پێدڤییە لسەر مە ئەم ل دەست پێکێ پێزانینان لسەر لەشێ مرۆڤی و هەموو نەخوشیان و دەرمانان و هتد.. کومبکەن، بەلێ ئەگەر من ئەڤ پێزانین ب دەست خستن ئەڤە رامانا هندێ نادەت کو ئەز بومە هۆستادڤی بواری دا، بەلکو پێدڤییە ئەز حەز ژ ڤی هونەری بکەم و ب دلەکی تژی ڤیان ئەز کارێن خوە ب رێڤەببەم. ئەڤ پرۆسێسە بۆ ڤیانێ ژی وەهایە، ژ بەر ڤێ چەندێ ئەگەر ئەم ب دروستی ل ڤیانێ گەهشتن و مە حەز ژێ کر ئەڤە دێ بیتە فاکتەرەک بۆ سەرکەڤتنا مە دڤێ پرۆسێسێ دا، بۆنمونە ئەگەر مە هەست پێکر کو ڤیانا وەلاتی د دلێ مە داهەیە، پێدڤییە هیچ تشکەک ڤیانا وەلاتێ مە ل دلێ مەدا کێم نەکەت،و ئەڤ ڤیانە ل سەرێ هەر تشتەکی بیت.

مەرەما من ژ نڤیسینا ڤی بابەتی ئەوە کو من دڤێت ئەز باس ل ڤیانا کەچ و کوران د جڤاکێ مەدا بکەم، و لێنێرینا خوە لسەر بێژم.
ب راستی ژی پرانیا کەچ و کورێن جڤاکێ مە وەسا تەماشەی ڤیانێ ناکەن کو ڤیان هۆنەرە و پێدڤی ب زانین و شیانایە، بەلکو بتنێ د چنە دناڤ تۆرا ئەڤینیێ دا بۆ ب دەستڤەئینانا خوشی و لەڤزەتێن دونیایێ، و ب مخابنی ڤە ئەڤ تێنەگهشتنا مە بۆ ڤیانێ بوو ئەگەر کو گەلەک کور و کەچێن جڤاکێ مە ببنە قوربانیێن ڤیانا شاش.

بارا پتریا پەیوەندیێن کور و کەچێن جڤاکێ مە د دەمێ نهۆدا ب رێکا تۆرێن جڤاکی یە، و ئەڤ رێکە ژی بوویە ئەگەر کو گەلەک ژ گەنجێن ڤی جڤاکێ ب تایبەتی کچ ببنە قوربانی، گەلەک جاران مە گوهـ لێبوویە ب رێکا تۆرێن جڤاکی کەچ کەڤتییە د داڤا کوری دا و پشتی پەیوەندییەکا ڤیانێ یا شاش، ئەڤێ کچێ وێنە یان پارچە فیدیویێن خوە یێن بێ ستارە بۆ کوری هنارتینە، و ل دیڤ را ئەڤی کوری کەف ل کچێ کرینە ب بەلاڤکرنا وێنە و پارچە فیدیوێن وێ، ئەگەر نە بتە ئێخسیرا دەستێ وی و هەموو حەزێن خوە یێن کرێت ب رێکا ڤێ کچێ دەستڤە نەئینێت.
ئەوا جهێ پرسیاری بۆ کوران ئەوە، بوچی ئەڤ کورە پرسیارێ ژ خوە ناکەت؟، ئەیا ئەگەر ئەڤ کچە ب ئەگەرا من تشتەکی ب سەرێ خوە بینێت؟ یان مالباتا وێ تشتەکی ب سەرێ وێ بینن؟ ــ کو ئەڤەژی د جڤاکێ مەدا یا باوە ــ ما ئەو کورە نزانیت ئەو بوویە ئەگەرێ ژناڤچوونا کەسەکی، و ب بکوژ دێ هێتەهژمارتن، و لبەرامبەر یاسا و دادگەهێ دێ هێتە سزادان، و رەنگە ب بیتە ئەگەرێ کێشەکا جڤاکی ژی دناڤبەرا دوو مالباتان دا.

ل دوماهیێ ژی ئەز دێ بێژم: دگەل هندێ دا نینم کو پەیوەندیێن ڤیانێ دناڤبەرا کور و کچان دا نەمینن، بەلکو هێڤی و خواستەکا من وەک کورەکی ڤێ جڤاکێ ئەوە کو کەچ و کورێن مە ب دروستی ل ڤیانێ بگەهن و پەنایێ ببنە بەر ڤیانەکا پاقژ و یا دروست و ڤیانەکا هەتا هەتای، و خو دوور بئێخن ژ حەزێن نە رەواێن دەم کورت.

زێدەتر ببینە

بابەتێن پەیوەندیدار

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close
Close