جڤاك

پرانیا ھەڤژینان شەرم دکەن ناڤێن ئێک بێژن

د جڤاکێ مەدا پرانیا ھەڤژینان شەرم دکەن ناڤێن ئێک و دوو بێژن ل دەمێ گازیکرنێ ، شوونا وان ھندەک ناسناڤ و ناڤێن دن بکاردئینن. شارەزایەکێ جڤاکی دیارکر کو ھەر کەسەک ب ناڤ و کەساتیا خوە جوانە و چوو ناسناڤ جھێ ناڤان ناگرن.
ھێ دەما تو دزڤری فلان تشتی بوو من بینە ئەڤە ئاخفتنێن شیمال شەعبان بوون کو ھەڤژینا وی ئەڤ ناڤە بو وی دانایە و ئەو دبێژیت : ( ھەر کەس بناڤێ خوە جوانە و ناڤ دبیتە پێناسەیا رەسەن یێ ھەر کەسەکێ ، ژ بەرڤێ دڤێت ئەم گرنگیێ ب ڤی واری بدەین بەلێ نھا ب بھانەیێن جودا جودا پرانیا ھەڤژینان ناڤێن ئێک و دوو نائینن و شوونا وان ھندەک ناڤ و پەیڤێن دن دئینن ب ھزرا من ناڤ نەئینان ژلایێ ھەڤژینان د زڤریت بو ئیک ژدوو ئەگەرا یان شەرم دکەن یان ژ خوە ناگرن )
دیارکر ژی کو ناڤ ئینانا ھەڤژینان ڤیان و حەزژێکرنێ و رێزگرتنێ د ناڤبەرا وان دا درۆست دکەت و پتر پەیوەندیێن وان خوەش دبن.
نارین عەزیز قوتابیەکا پەیمانگەھێ یە دیارکر کو ئەو دگەل ھندێ یە ب چوو رەنگان ھەڤژین چوو سالوخەت و ناسناڤان بو ئێک و دوو نەدانن و گۆت : ( پرانیا وان ناڤ و سالوخەتێن دھێنە گوتن ژلایێ ھەڤژینان ” ھێ ، کرێتێ ، گێژێ ، رەشێ ، بەژنکورتکێ یان کورت کو ، ڤێرە ، دابوتە بێژم ، دا چ بێژم …ھتد” یان ب لڤلڤینێن دەستان گازی ئیک دکەن کو ئەڤەژی تشتەک شاش و نەجوانە ، ل ڤێرە ئەم دکارین شوونا پەیڤێن سەری پەیڤێن ” ماموستا ، بابێ یان دایکا فلانی ، ھێژا ، خاتین ، جوانێ ، خوشتڤی یان خوشتڤیا من ، … ھتد ” کو ئەڤە جوانترین پەیڤن بەرامبەر ئێک و دوو بکاربینن ، بەلێ د ھەمان دەم دا جوانترین رەفتار ئەوە ئەو ب ناڤێن خوە بھێنە گازیکرن)
ل سەر ئاخفتنێن نارینێ دلێر جانگیر شارەزایێ جڤاکی ل ھەولێرێ دیارکر ئینانا ناڤان پتر باشیێن خوە ھەنە ژ نەئینانا وان و گۆت : (نە ئینانا ناڤان پتر ل دەڤ زەلامان ھەیە و ئەگەرا وێ ژی دزڤریت عەلا ئەساس ئەم سەروک و رێبەرێن مالێ نە و دڤێت ھەموو ئەندامێن مالێ رێزێ ل مە بگرن کو د رەسەندا ھەموو ئەندامێن مالێ دڤێت وەکو ئێک بن و کەس ل کەسێ بلندتر نینە د ئەرک و مافان دا ، ب ھزرا من ھەکە ئینانا ناسناڤ و سالوخەت ل شوونا ناڤان نەبیتە ئەگەرا شکاندنا کەسێ بەرامبەر و نیشانێن شکەستن و ترانەپێکرن و بێ رێزیێ تێدا نەبیت تشتەکێ نورمالە و درۆستە بەلێ دگەل ھندێ ھەر ئێک بناڤێ خوە جوانە)
دلێری ھێشتا گۆت : ( ئەو ھەڤژینێن ب چ ئەگەرا ھەبیت ناڤێن ئێک و دوو نەئینن و شوونا وان ھندەک پەیڤێن دن یێن شاش بکاربینن بێ گومان کارتێکرنێن نەرێنی ل سەر پەیوەندیێن وان ب شێوازێ دەمکی دکەت و ھەموو دەما ددلێ وان دا ھەستەکا لاواز پەیدادبیت و ب بەردەوامی یا ئەڤێ چەندێ نەدویرە ئەڤ ھەستە دەر بکەڤیت)
ل زاخو ماموستا و رۆژنامەڤانێ گەنج زیرەک ێەدیق دیارکرکو بکارئینانا پەیڤێن نەجوان ژ بلی شکاندنا ھەستێ بەرامبەر د ھەمان دەم دا دلان ژی دشکێنن و گۆت : ( پرانیا ھەڤژینان ئەڤ چەندە یا بخوکریە عادەت و ب تشتەکێ نورمال دبینن ، بکارئینانا پەیڤێن زڤر و دل ئێش شوونا ناڤی ئەز نابینم چوو مەرەمێن جوان تێدا بن ژ بلی نەرێزگرتن و شکاندنا کەسێ بەرامبەر ب تایبەتی ناڤ نەخوشکرن و بکارئینانا ھندەک سالوخەتان ل شوونا وان ، ھەڤژینی پێدڤی ب ناڤێن پیروز و رێزگرتن و وەفا داریێ و ڤیانێ یە و دڤێت مەدح و رێزگرتن و حەژێکرن و ناڤ جوانکرن دناڤبەرا ھەڤژینان دا بەردەوامی بۆ ھەبیت نەخاسمە ل دەما خاترخواستن و ڤەگەریانێ و ل دەڤ ئەندامێن مالێ ژ بەرکو ئەڤ چەندە کارتێکرنێن ئورگانی ل دەڤ ھەڤژینان پەیدا دکەت و پتر دێ د ئێک و دوو گەھن و درێژی بوو پەیوەندیێن وان ھەبیت )

زێدەتر ببینە

بابەتێن پەیوەندیدار

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close
Close